Աբու Դաբին Արաբական էմիրությունների մայրաքաղաքն է, այստեղ բնակվում է մոտ մեկ ու կես միլիոն մարդ: Շատ հետաքրքիր պատմություն կա կապված քաղաքի ստեղծման հետ: Արաբ որսորդները օազիսներից մեկում հետապնդում են եղջերուի ու այդպես հասնում են մինչ Պարսից ծոցի ափերը, որտեղ եղջերուն ջուրն է նետվում ու որսորդներին տանում դեպի կղզիներից մեկում գտնվող քաղցրահամ աղբյուրի մոտ: Ի նշան երախտագիտության, որսորդները չեն սպանում եղջերուին և անվանում են այս վայրը Աբու Դաբի, ինչը նշանակում է՝ Եղջերուի հայր: Դուբայից տրանսֆերով մոտ ժամ ենք գնացել: Ավելի հանգիստ է քան Դուբայը, ու ավելի պասիվ... 3 օր մաքսիմում:
Ընտրեցինք այս գեղեցիկ հյուրանոցը, որը մեզ Emirates AM ընկերությունը խորհուրդ տվեց ամրագրել, հենց կենտրոնում գտնվող Khalidiya Palace Rayhaan by Rotana:
Առաջինը որ գոհացրեց լողավազանն է, որը Աբու Դաբիի ամենամեծ լողավազանն է, սպասարկումը բարձրակարգ է, ինտերնետը շատ վատն է, մեր սենյակն էլ ինքներդ գնահատեք...
10 տարի առաջ Աբու Դաբիում բացվել է աշխարհի ամենաշքեղ մզկիթներից մեկը ՝ Sheikh Zayed-ի մզկիթը մինչև 40 000 այցելուների համար:
Մարմարե մզկիթն ունի 82 գմբեթ, մուտքն ազատ է, այն բացառիկ է նրանով, որ քրիստոնեաները ևս կարող են այստեղ հանգիստ այցելել: Պետք է հանել կոշիկները և լուսանկարվելուց չի կարելի ձեռքերով ժեստեր անել: Եթե շորտերով եք, ձեզ կստիպեն կրել իրենց հագուստը, քանի որ ծնկներն այստեղ պետք է փակ լինեն:
Մզկիթը հայտնի է նրանով, որ այստեղ է աշխարհի ամենամեծ խալին, որը ստեղծվել է նկարիչ Ալի Խալիկիի աշխատանքի հիման վրա: Խալու մակերեսն է ավելի քան 5000 քմ, մոտ 1200 գորգագործներ են աշխատել, իսկ կշիռը կազմում է 47 տոննա: Մզկիթի ներսում կան 7 հսկայական ջահեր, որոնք զարդարված են ոսկով և Swarovski բյուրեղապակիներով: Ամենամեծ ջահի բարձրությունն է 15 մետր, ինչի շնորհիվ երկար տարիներ այն համարվում էր աշխարհի ամենամեծ ջահը:
Մենք ինքներս զարմացանք, երբ տեղեկացանք, որ Աբու Դաբիում բացվում է LOUVRE! Պաշտոնական բացումը նախորդ շաբաթ էր. Արաբական Louvre-ի միայն շինարարական աշխատանքների բյուջեն կազմել է մոտ 600 միլիոն եվրո. Այս պահին Աբու Դաբիի Louvre թանգարանում ներկայացված են Պիկասոյի, Վան Գոգի, Լեոնարդո Դա Վինչիի, Մոնեի, Մատիսի գործերը, շուրջ 300 արվեստի նմուշ կա ցուցադրված: Մուտքի արժեքն է 30-60 դերհամ...
Հիշեցնեմ, որ բացվել է այն բառացիորեն մի քանի օր առաջ ու մենք շատ ուրախ ենք առաջինը այն ձեզ ներկայացնել...Մինչ 2037թ.-ը փարիզյան Louvre-ը պարտավորվում է արաբական Louvre-ին տրամադրել արվեստի գործեր, անվճար խորհրդատվություն տրամադրել և թույլատրել Louvre բրենդի օգտագործումը: Այս ամենի համար իշխանությունները վճարել են Ֆրանսիային 1 միլիարդ եվրո:
7 տարի առաջ բացվել է Ferrari World-ը, 200 000 քմ, թեմատիկ ատրակցիոններ և աշխարհի ամենաարագընթաց ամերիկյան գորկան: Իրականում մուտքի գինը՝ 90$-ը գերագնահատված էր, 3 մեծ ատրակցիոնները նորից վճարովի էին, բայց ամեն դեպքում հետաքրքիր էր...
Ահա այսպիսինն է աշխարհի ամենաարագ սլացող ատրակցիոնը, 240 կմ/ժամ արագությամբ:
Իհարկե Աբու Դաբիում էլի հետաքրքիր վայրեր կան, մենք հասցրեցինք այսքանն այցելել: Վերջում ներկայացնում եմ ևս մեկ հետաքրքիր շինություն: Պարզվում է, սա Աշխարհի ամենամեծ թեքությունն ունեցող շենքն է, որը 4.5 անգամ ավելի կոր է, քան մեր բոլորի իմացած Պիզայի աշտարակն Իտալիայում: Շինությունն այս կոչվում է Capital Gate, ներսում Hyatt հյուրանոցն է և գրասենյակներ: Capital Gate թարգմանաբար նշանակում է Մայրաքաղաքի դարպասներ: Բարձրությունը 160 մետր է, կառուցվել է բրիտանացիների կողմից, ասեմ, որ շատ թանկ չէ այստեղ մնալը՝ օրական 130$: